ການມີເປົ້າໝາຍທີ່ຍັງບໍ່ທັນສຳເລັດ ອາດເຮັດໃຫ້ທ່ານໝົດກຳລັງໃຈ ໃນການເຮັດວຽກ. ເພາະການມະໂນພາບຄວາມສຳເລັດ ໃນຂະນະທີ່ກຳລັງເດີນທາງ ແມ່ນມັກມີແນວຄິດປົນກັບຄວາມລົ້ມເຫຼວທີ່ອາດມີ ຈົນເຮັດໃຫ້ຄົນຄິດຈິນຕະນາການແນວບໍ່ດີໃນອານາຄົດ.
ໃນການອອກກຳລັງກາຍ; ໃຜໆກະຢາກຫຸ່ນດີ. ມີຫຼາຍຄົນຢຸດການອອກກຳລັງກາຍ ເພາະບໍ່ສາມາດລົດນໍ້າໜັກໄດ້ຕາມເປົ້າໝາຍທີ່ກຳນົດຕາມເວລາ. ສາເຫດມັກເປັນເພາະ ຖ້າມື້ນີ້ບໍ່ໄດ້ໄປອອກກຳລັງກາຍ ກໍ່ອາດມີມື້ຕໍ່ໆໄປນຳ. ເຮັດໃຫ້ເຮົາຮູ້ສຶກວ່າຊ້າ, ເມື່ອຍ ແລະ ຈິດໃຈກໍ່ເລີ່ມບໍ່ສູ້. ເມື່ອມາເບິ່ງເປົ້າທີ່ຕັ້ງໄວ້ກັບຕົວຈິງ ກະເລີຍເຮັດໃຫ້ຄົນທໍ້. ສະນັ້ນ ທ່ານຄວນພະຍາຍາມເຮັດໃຫ້ການອອກກຳລັງກາຍເປັນຊີວິດປະຈຳວັນສ່ວນໜຶ່ງ.
ທ່ານຄວນຕັ້ງໂມງອອກກຳລັງກາຍປະຈຳວັນ ຫຼື ເປັນຊ່ວງເວລາທີ່ແນ່ນອນ. ຂ້າພະເຈົ້າຈະອອກ ກຳລັງກາຍຢ່າງ ໜ້ອຍ ໜຶ່ງຊົ່ວໂມງຕໍ່ທຸກໆ2ມື້. ແຕ່ໃນຄວາມຈິງ ມັນເປັນສິ່ງທ້າທາຍທີ່ຈະຈັດຕາຕະລາງຊົ່ວໂມງ ຫລື ຈັດສັນເວລາ 45 ນາທີ ເພື່ອການອອກກຳລັງກາຍໂດຍບໍ່ມີການຂັດຂວາງໃດໆ. ບາງມື້, ມັນເປັນໄປບໍ່ໄດ້ ເພາະກອງປະຊຸມ ແລະ ກິດຈະກຳທາງຄອບຄົວ. ນັ້ນເປັນເຫດຜົນທີ່ຫຼີກລ່ຽງບໍ່ໄດ້. ງານເຮືອນດີ, ເຮືອນດອງ, ແລະ ກິດຈະກຳທາງສັງຄົມ ມັນດົນໆມີຄັ້ງໜຶ່ງ. ການເສຍສະຫຼະເວລາ ມັນຈິ່ງເປັນເລື່ອງທຳມະດາ.
ບໍ່ມີເວລາໃດດີພ້ອມເທົ່າກັບວັນທີ່ລົງມືເຮັດ.
ຄວາມຄິດບໍ່ຢາກໄປຕ່າງຫາກທີ່ເປັນຕົວຂັດຂວງແທນການມີກິດຈະກຳທາງສັງຄົມ. ເຊື່ອວ່າບໍ່ມີໃຜຈະມີງານສັງຄົມຕະຫຼອດ. ດັ່ງນັ້ນ, ການສະຫຼະເວລາໃນແຕ່ລະວັນເພື່ອອອກກຳລັງກາຍຈິ່ງເປັນສິ່ງທີ່ຈຳເປັນຫຼາຍ ແລະ ເຮົາສາມາດຄວບຄຸມໄດ້.
ໃນຊີວິດການເຮັດທຸລະກິດຄືກັນ. ມັນກໍ່ຈະມີເປົ້າຫມາຍທີ່ເຮົາຍັງບໍ່ໄປເຖິງ ແລະ ປະຈຸບັນພັດມີບັນຫາຫຼາຍອັນອີກ. ເປັນຕົ້ນ ຄ່າແລກປ່ຽນເງິນຕາທີ່ບໍ່ຄົງຕົວ. ນີ້ກໍ່ຄືຖືກກັບຄວາມຈິງກັບການດຳເນີນທຸລະກິດ ເຊັ່ນກັນ. ທ່ານອາດຈະມີບາງສິ່ງບາງຢ່າງທີ່ສຳຄັນ ຕ້ອງບັນລຸ. ກົງກັນຂ້າມພັດຍັງບໍ່ທັນສາມາດເຮັດໄດ້. ເພາະວ່າທ່ານບໍ່ມີເວລາ ຫລື ຊັບພະຍາກອນທີ່ດີທີ່ສຸດໃນການອຸທິດຕົນ. ທ່ານອາດຈະລໍຖ້າຈົນກວ່າທ່ານຈະມີສະພາບແວດລ້ອມທີ່ສົມບູນແບບ, ມີເວລາທີ່ເໝາະສົມ ແລະ ທຸກຢ່າງທີ່ທ່ານຕ້ອງການກໍ່ຈະມາເອງ. ແຕ່ເດົາຫຍັງອອກບໍ່? ບໍ່ມີເວລາໃດດີພ້ອມເທົ່າກັບວັນທີ່ລົງມືເຮັດ.
ບໍ່ວ່າແມ່ນຫຍັງຈະເກີດຂື້ນ ພວກເຮົາກໍ່ບໍ່ຄວນເຊົາ ຫາກຍັງບໍ່ທັນບັນລຸເປົ້າ
ຖ້າທ່ານຕ້ອງການບາງສິ່ງບາງຢ່າງໃຫ້ເກີດຂື້ນ, ທ່ານຕ້ອງເອົາສິ່ງທີ່ທ່ານມີມາເຮັດ ໃຫ້ໄດ້ຕາມເປົ້າໝາຍທີ່ເປັນຈິງ ແລະ ເຮັດໃຫ້ມັນເກີດຂື້ນ. ເຖິງແມ່ນວ່າມັນຈະເປັນບາດກ້າວແບບປະຖົມປະຖານ, ແຕ່ຄວາມກ້າວໜ້າທຸກໆຄັ້ງ ມັນຈະສ້າງຕໍ່ໄປຈົນກໍ່ຕົວສາມາດສ້າງເປັນກຳລັງໃຈ ແລະກ່ອນທີ່ທ່ານຈະຮູ້ມັນ, ທ່ານອາດຈະກ້າວໄປສູ່ເປົ້າໝາຍ ຂອງທ່ານເຄິ່ງໜຶ່ງ ແທນທີ່ຈະເບິ່ງກັບຄືນໃນໄລຍະສາມເດືອນທີ່ທ່ານປາດຖະໜາ ທີ່ທ່ານຫາກໍ່ເລີ່ມຕົ້ນ ເຊິ່ງຍັງບໍ່ທັນເຫັນຫັຍງເທື່ອ.
ມີສຽງນີ້ຄຸ້ນເຄີຍກັບເຈົ້າບໍ? ສຽງຕົບມືຊົມເຊີຍ, ສຽງຮ້ອງໂຫໃນຄວາມສຳເລັດ ຈາກທີມງານ ແລະ ທ່ານເຄີຍລວບລວມຄວາມຄາດຫວັງທີ່ດີທີ່ຍັງບໍ່ມີຄວາມຈິງ ແລະ ໄດ້ຊຸກຍູ້ຕົວທ່ານເອງໃນວັນນີ້ຫຼືຍັງ? ແມ່ນແຕ່ໃນເວລາທີ່ສິ່ງຕ່າງໆບໍ່ໄດ້ຕາມທີ່ທ່ານຄາດຫວັງໄວ້ ຫຼື ຫວັງວ່າມັນຈະເປັນຈິງເມື່ອໃດ? ແຕ່ເຮົາກະຍັງເຮັດດ້ວຍຄວາມສາມາດ, ສະຕິປັນຍາ ແລະ ການທົບທວນ ເພື່ອໃຫ້ໄດ້ຕາມເປົ້າໝາຍ ຈິ່ງຢຸດເຮັດ.
ທ່ານມີຄຳແນະນຳໃດຕື່ມອີກບໍ່ໃນຫົວຂໍ້ນີ້ ຫຼື ມີປະສົບການທີ່ແຕກຕ່າງຈາກນີ້, ຊ່ວຍແບ່ງປັນປະສົບການນັ້ນໃນທີ່ນີ້ດ້ວຍ ເພື່ອເປັນການໃຫ້ຄົນອື່ນໄດ້ຮຽນຮູ້ນຳກັນ.