ທຸລະກິດທີ່ສ້າງຂື້ນມາກັບມື, ມັນຕ້ອງແລກດ້ວຍການທຸ້ມເທໃນການສ້າງທັງເຫື່ອແລະນໍ້າຕາ. ມັນເປັນຣົດຊາດຂອງ ທຸລະກິດທີ່ສະຫງວນໄວ້ແກ່ຄົນທີ່ພ້ອມຈະຜ່ານຜ່າ. ບໍ່ແມ່ນພວກມັກສະບາຍເອົາປຽບລູກຄ້າ. ຖ້າຄິດເຮັດທຸລະກິດຫວັງສະບາຍໃນຂ້າງໜ້າ, ວັນນີ້ທ່ານຕ້ອງບຸກບືນ.
ນັກທຸລະກິດຈະມີໄຟໃນຕົວສະໜີ. ໄຟທີ່ພ້ອມຈະເຜົາຜານໄປກັບການເຮັດທຸລະກິດໃນວັນໆ. ມັນຄ້າຍຄືກັບການລວມກັນຂອງຄວາມຢາກ ກາຍເປັນຄວາມເຂັ້ມຂົ້ນຂອງຊີວິດ. ເບິ່ງຜູ້ປະກອບການທີ່ປະສົບຜົນສຳເລັດທີ່ທ່ານຮູ້ຈະມີປະສົບການນັ້ນ. ຂ້າພະເຈົ້າແນ່ວ່າພວກເຂົາມີໄຟ. ມັນອາດຈະບໍ່ແມ່ນການຮ້ອງໄຫ້ຕໍ່ໜ້າສັງຄົມໃຫ້ເຫັນໃຈ, ແຕ່ວ່າມັນມີໄຟທີ່ຢູ່ທີ່ນັ້ນ ພ້ອມນຳໃຊ້ໃນເວລາເກີດວິກິດ.
ຄວາມສຳເລັດບໍ່ແມ່ນແຕ່ຈະເບິ່ງທີ່ກຳໄລການເງິນ, ເຮົາຕ້ອງສຳສົມກຳໄລຊີວິດຈາກການເຮັດທຸລະກິດ
ທ່ານຍັງມີໄຟບໍ່? ເຖິງແມ່ນວ່າທ່ານຮູ້ສຶກມີ, ມັນຈະເຮັດໃຫ້ທ່ານລຸກຂຶ້ນນຳໃຊ້ພະລັງານ ແລະ ສົ່ງແຮງໃຈເຂົ້າໃນທຸລະກິດຂອງທ່ານສະເໜີ. ຖ້າບໍ່ມີໄຟ, ມັນເກືອບຈະເປັນໄປບໍ່ໄດ້ທີ່ຈະສາມາດບັນລຸເປົ້າໝາຍ ທີ່ມີຄວາມທະເຍີທະຍານ, ພາຍູ້ຕົວທ່ານເອງທີ່ເກີນຂີດຈຳກັດຂອງທ່ານທີ່ທ່ານຄິດວ່າບໍ່ເຄີຍມີ, ແລະໃຫ້ຄຳຕອບວ່າ: “ບໍ່ເປັນຄືຫຼາຍຄົນເວົ້າ” ເມື່ອທຸກຄົນເວົ້າວ່າ “ແມ່ນ”
ການສາງ “ໄຟ” ໃນຕົວແມ່ນມາຈາກການເບິ່ງ, ການຮຽນຮູ້, ການປະກອບສ່ວນ ແລະ ການແບ່ງປັນຄວາມສຳເລັດກັບຄົນອື່ນ. ບໍ່ມີຫຍັງທີ່ຄ້າຍຄືກັບປະສົບການການຮ່ວມມືທີ່ປະສົບຜົນສຳເລັດ, ໂດຍສະເພາະໃນເວລາທີ່ທ່ານມີອຳນາດໃນການປ່ຽນແປງວິທີທີ່ຄົນເຮົາເຮັດ ແລະ ຄິດໃນສິ່ງຕ່າງໆໃນທາງບວກ.
ຄົນບາງຄົນອາດບໍ່ຮູ້ວ່າໄຟຂອງພວກເຂົາມາຈາກໃສ? ມີຫຼາຍປານໃດ? ໄດ້ຈາກໃຜແດ່? ແຕ່ຮູ້ດີວ່າ: ໄຟມັນໄດ້ເຮັດໃຫ້ນັກທຸລະກິດຜ່ານວັນຄືນອັນເຈັບປວດທີ່ຍາວນານ ແລະ ສິ່ງທ້າທາຍທີ່ຫຍຸ້ງຍາກນານັບບໍ່ໄດ້; ມັນບັງຄັບໃຫ້ປ່ອຍຄວາມປາຖະໜາ ເພື່ອສ້າງຄວາມສົມບູນແບບ ແລະ ພຽງແຕ່ປ່ອຍໃຫ້ສິ່ງຕ່າງໆຫາຍໄປກັບລົມຫາຍໃຈ; ມັນຈະເຮັດໃຫ້ມີການສ້າງສັນ ກາຍເປັນຊັບພະຍາກອນທີ່ເປັນປະໂຫຍດ ຕໍ່ເຈົ້າຂອງທຸລະກິດຂະໜາດນ້ອຍ.
ສະນັ້ນ…ສິ່ງທີ່ເຮັດໃຫ້ທ່ານເກີດມີໄຟໃນຕົວຂື້ນມາແມ່ນຫຍັງ?
ສິ່ງໜຶ່ງ ທີ່ເຮັດໃຫ້ທ່ານຕື່ນໃນຕອນກາງຄືນ, ແລ້ວຄິດເຖິງການເຄື່ອນໄຫວຕໍ່ໄປຂອງທ່ານ ແມ່ນວິທີທີ່ທ່ານຈະປ່ຽນແນວຄວາມຄິດຂອງທ່ານໃຫ້ເປັນການກະທຳ ອັນຈະສ້າງຜົນປະໂຫຍດແກ່ທຸລະກິດ ໃນພາຍພາກໜ້າ.
ຄົນບໍ່ຮູ້ປັນຫາ ແລະ ຄົນບໍ່ຮູ້ທາງແກ້. ຮ້າຍແຮງກວ່ານັ້ນ, ຄົນບໍ່ຮັບຮູ້ປັນຫາ ແມ່ນຄົນບໍ່ຮັບການປ່ຽນແປງໃໝ່
ເຫັນປັນຫາບໍ່?
ຄົນເຮົາມັກຢ້ານປັນຫາ. ຖ້າທ່ານຢາກພັດທະນາ ແມ່ນໃຫ້ຮັບຮູ້ປັນຫາ ແລະ ຊອກທາງແກ້. ປັນຫາເຮັດໃຫ້ຄົນຮູ້ສຶກ ບໍ່ປອດໄພ, ລັງເລ ແລະ ສົງໃສ. ຫາກປ່ອຍຊີວິດເປັນໄປຕາມປັນຫາ, ທ່ານກໍ່ຈະບໍ່ຮູ້ຈັກວິທີແກ້ໄຂ.
ບັນຫາຈະມີສະເໜີ ເຖິງວ່າທ່ານຈະບໍ່ເຮັດທຸລະກິດ. ເຊັ່ນ: ການດຳເນີນຊີວິດປະຈຳວັນ, ບັນຫາສະພາບແວດລ້ອມ, ປັນຫາຄວາມຮັກ ແລະ ອື່ນໆ. ເວລາທ່ານພົບປັນຫາ ທ່ານຖາມຄຳຖາມເຫຼົ່ານີ້ຫຼືບໍ່?
- ທ່ານອາດຈະຮຽນຮູ້ບາງສິ່ງບາງຢ່າງໃນການແກ້ໄຂ?
- ທ່ານອາດຈະຖືກບັງຄັບໃຫ້ຄິດໃນທາງໃໝ່?
- ທ່ານອາດຈະຊອກຫາໂອກາດຮ່ວມມືໃໝ່?
- ທ່ານອາດພິຈາລະນາຮູບແບບການເຮັດວຽກໃໝ່?
- ທ່ານອາດຈະໄດ້ຮັບການດົນບັນດານໃຈໃຫ້ເຮັດດີກວ່າເກົ່າ?
- ທ່ານອາດຈະໄດ້ເຮັດສິ່ງໃໝ່ໆທີ່ຍັງບໍ່ເຄີຍເຮັດ ທີ່ເປັນຂໍ້ຈຳກັດຂອງທ່ານ?
- ໃນທີ່ສຸດທ່ານພ້ອມຈະເຂົ້າໄປໃນຂົງເຂດໃໝ່ ທີ່ບໍ່ໄດ້ວາງແຜນມາກ່ອນຫຼືບໍ່?
- ທ່ານອາດຈະພໍໃຈກັບສິ່ງທີ່ເປັນ ຫຼື ຊອກຫົນທາງໃໝ່?
- ທ່ານອາດກວດກາຄວາມເປັນຈິງແລ້ວສົມທຽບກັບສິ່ງທີ່ວາງແຜນ ວ່າມັນຈະບັນລຸເປົ້າຫຼືບໍ່?
- ທ່ານອາດຈະພົບກັບຄວາມເຂັ້ມແຂງທີ່ທ່ານບໍ່ເຄີຍຮູ້ວ່າທ່ານເຄີຍມີ?
- ທ່ານອາດຈະຕ້ອງຍອມຮັບວ່າ ສິ່ງທີ່ເຮັດມາ ອາດຍັງບໍ່ດີພໍ ເພື່ອເຮັດສິ່ງໃໝ່?
- ທ່ານອາດຈະມີໂອກາດໄດ້ຮັບຄຳແນະນຳທີ່ດີໄດ້ຈາກໃສ?
- ທ່ານອາດຈະເຫັນວ່າ ປັນຫາສ້າງໂອກາດ ແລະ ນຳໂຊກດີຫຼາຍປານໃດມາໃຫ້ທ່ານ?
ຂ້າພະເຈົ້າບໍ່ແນະນຳໃຫ້ເຮັດທຸລະກິດ ທີ່ສ້າງປັນຫາໃນສັງຄົມ. ອັນນັ້ນເປັນຄົນລະເລື່ອງດຽວກັນ. ປັນຫາໃນນີ້ໝາຍວ່າເກີດຂື້ນໃນຊ່ວງການດຳເນີນທຸລະກິດ ແລະ ທ່ານຕ້ອງພ້ອມທີ່ຈະແກ້ໄຂ ເພື່ອໃຫ້ໄດ້ຮັບຜົນປະໂຫຍດບາງຢ່າງ, ມີເຫດຜົນທີ່ຈະແກ້ໄຂບາງຢ່າງ, ທ່ານເລືອກໜີ ຫຼື ທ່ານປະເຊີນໜ້າກັບມັນ? ທ່ານບໍ່ຄວນເບິ່ງບັນຫາໃນທາງບວກ, ແທນການເບິ່ງຕົວຈິງ. ແລ້ວນຳໃຊ້ວິທີແນວຄິດແກ້ໄຂ ປ່ຽນສະຖານະການໃຫ້ດີຂື້ນ.
ທ່ານມີຄຳແນະນຳໃດຕື່ມອີກບໍ່ໃນຫົວຂໍ້ນີ້ ຫຼື ມີປະສົບການທີ່ແຕກຕ່າງຈາກນີ້, ຊ່ວຍແບ່ງປັນປະສົບການນັ້ນໃນທີ່ນີ້ດ້ວຍ ເພື່ອເປັນການໃຫ້ຄົນອື່ນໄດ້ຮຽນຮູ້ນຳກັນ.